Цаг агаарын өөрчлөлт, нүүр будалт, ядрах, агаарын бохирдол зэрэг нь арьс гундаж, өнгөө алдах гол хүчин зүйлс юм. Өдөр тутамдаа хэрэгжүүлэхэд хялбар доорх зөвлөгөөг дагаарай.
ӨДӨР БҮР АРЬСАА ЦЭВЭРЛЭ
Нүүрний арьс бол биеийн бусад хэсгүүдтэй харьцуулахад хамгийн эмзэг мэдрэмтгий бөгөөд гадна орчны таагүй нөлөөнд тун мэдрэг, амархан өнгө алдаж, гундаж байдаг. Тиймээс өнгөлөг, гэрэлтсэн арьстай байхын тулд өглөө, оройд нүүрний будгаа маш сайн арилгаж, цэвэрлэж байх хэрэгтэй. Нүүрний будаг арилгах зориулалтын цэвэрлэгч нь арьсны бохирдлыг цэвэрлэхээс гадна өдөр ба шөнийн арчилгаанд арьсыг бэлтгэж өгдөг. Өглөөд, хүнд найрлагатай будаг арилгагч шингэнээс илүүтэй мицелляр ус хэрэглэх нь тохиромжтой. Харин оройд сүүн эсвэл тосон бүтэцтэй будаг арилгагч сонгох нь зүйтэй. Учир нь арьсыг илүү гүн түвшинд цэвэрлэдэг.